ដោយ : បន្ទាយ

បន្ទាយមានជ័យ ៖ ពិធីបិទវគ្គបណ្តុះបណ្តាលគ្រូបង្វឹក ចៅក្រម អាជ្ញាកណ្តាល កីឡាបញ្ចស៊ីឡាត់កម្រិតមូលដ្ឋាន ឆ្នាំ២០២៥ នៅបន្ទាយមានជ័យ ក្រោយបញ្ចប់វគ្គបណ្តុះបណ្តាលរយៈពេល៣ថ្ងៃ ក្នុងខែមករា ឆ្នាំ ២០២៥ កន្លងមកថ្មីៗនេះ ។

ពិធីធ្វើនៅសាលប្រជុំធំ ជាន់ទី២ អគារសេនាធិការដ្ឋានកងរាជអាវុធហត្ថខេត្តបន្ទាយមានជ័យដែលមានលោកឧត្តមសេនីយ៍ត្រី សឹង្ហ ទុំ មេបញ្ជាការកងពលតូចថ្មើរជើងលេខ៥១ យោធភូមិភាគទី៥ និងជាអនុប្រធានអចិន្ត្រៃយ៍ សហព័ន្ធកីឡាបញ្ចស៊ីឡាត់កម្ពុជា តំណាងលោកឧត្តមសេនីយ៍ទោ សេង ធារិន មេបញ្ជាការរង នាយសេនាធិការយោធភូមិភាគទី៥ និងជាប្រធានសហព័ន្ធកីឡាគុនបញ្ចស៊ីឡាត់កម្ពុជា និងលោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្តបន្ទាយមានជ័យ និងជាអនុប្រធានបានអញ្ជើញជាអធិបតីភាព។

លោកឧត្តមសេនីយ៍ត្រី សឹង្ហ ទុំ បានថ្លែងនូវការកោតសរសើរដោយសេចក្តីសោមនស្សរីករាយ ដែលបានចូលរួមបិទវគ្គបណ្តុះបណ្តាលគ្រូបង្វឹកចៅក្រម អាជ្ញាកណ្តាល កីឡាបញ្ចស៊ីឡាត់កម្រិតមូលដ្ឋាន ឆ្នាំ២០២៥ ក្រោយបញ្ចប់ការបណ្តុះបណ្តាលរយៈពេល០៣ថ្ងៃប្រកបដោយផ្លែផ្កា បើទោះបីមានរយៈពេលខ្លីក៏ដោយ។

លោកឧត្តមសេនីយ៍ត្រីបានបន្តថា : ស្ថិតនៅក្នុងបរិការណ៍ការកែទម្រង់អន្តរកាល គោលនយោបាយរបស់រាជរដ្ឋាភិបាលកម្ពុជានីតិកាលទី៧ នៃរដ្ឋសភា ក្រោមការដឹកនាំប្រកបដោយកិតិបណ្ឌិតសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ពិតជាមិនខ្វះបាននូវការចូលរួមជាធាតុផ្សំគ្រប់ជ្រុង ដោយផ្អែកលើបរិការណ៍ជាក់ស្តែងនៅក្នុងប្រទេស តំបន់ និងពិភពលោក ព្រមទាំងបទពិសោធនៃការអនុវត្តពីដំណាក់កាល កំណែទម្រង់មុនៗ ដោយសម្លឹងឆ្ពោះទៅមុខសម្រេចឱ្យបាននូវគោលដៅនៃការកសាងជាតិ ស្របតាមចក្ខុវិស័យកម្ពុជាឆ្នាំ២០៥០ ការអភិវឌ្ឍន៍វិស័យកីឡាបញ្ចស៊ីឡាត់នៅកម្ពុជា ក៏ជាធាតុផ្សំមួយដ៏សំខាន់ផងដែរ៕